---

Samþykktir Inter - Samtök aðila er veita Internetþjónustu

1. Heiti félagsins er Inter - Samtök aðila er veita Internetþjónustu.
   
   
2. Hlutverk félagsins er að gæta hagsmuna félagsmanna sinna.
   
   
3. Stjórnin skipar starfsnefndir eftir því sem hún telur ástæðu til.
   
   
4. Félagar geta allajafna orðið þeir aðilar sem endurselja Internettengingar, eða hýsa þjónustu á Internetinu á Íslandi. Stjórn skal fjalla um umsóknir sem berast og leiki vafi á félagsaðild skal málinu skotið til félagsfundar.
   
   
5. Rétt til setu á fundum félagsins hafa allir félagsmenn og fulltrúar þeirra. Hver félagi fer með eitt atkvæði á fundum. Komi fleiri en einn fulltrúi frá hverjum félaga fer einn þeirra með atkvæðisrétt.
   
   
6. Félagar skulu víkja úr félaginu uppfylli þeir ekki skilyrði þess til inngöngu.
   
   
7. Upphæð félagsgjalda skal ákveðin á aðalfundi. Greiðsla skal innt af hendi innan mánaðar frá lokum aðalfundar.
   
   
8. Reikningsár félagsins er á milli aðalfunda. Reikningum skal lokað 30 dögum fyrir aðalfund og þeim skilað til endurskoðenda félagsins.
   
   
9. Til aðalfundar skal boða með tryggum hætti. Aðalfundur telst löglegur ef athugasemdir við boðun hans hafa ekki borist fyir upphaf hans. Afl atkvæða ræður úrslitum á aðalfundi nema annað sé sérstaklega tekið fram í lögum þessum.
   
   
10. Dagskrá aðalfundar skal vera:
    1. Skýrsla stjórnar
    2. Stjórn leggur fram endurskoðaða reikninga félagsins.
    3. Umræður um skýrslu og reikninga.
    4. Félagsgjöld næsta árs ákveðin
    5. Lagabreytingar og tillögur
    6. Kosning stjórnar fyrir næsta starfsár
    7. Önnur mál
    
    
11. Lögum félagsins verður aðeins breytt á aðalfundi félagsins. Tillögum til lagabreytinga skal skila skriflega 7 dögum fyrir aðalfund til stjórnar. Stjórn skal kynna félögum lagabreytingar fyrir aðalfund. Nái lagabreytingatillaga samþykki 2/3 hluta fundarmanna telst hún samþykkt.
    
    
12. Stjórn félagsins skipa 3-4 menn, formaður, ritari og féhirðir. Formaður skal kosinn sérstaklega en að öðru leyti skiptir stjórn með sér verkum. Kjósa skal tvo menn til vara og einn endurskoðanda.
    
    
13. Stjórnin er kjörin til 1 árs í senn.
    
    
14. Hætti stjórnarmaður í stjórn skal varamaður taka við embætti hans fram að næsta aðalfundi.
    
    
15. Stjórn félagsins ræður málefnum félagsins með þeim takmörkunum sem lög þessi setja. Stjórnin kemur fram fyrir hönd félagsins, jafnt á innlendum sem erlendum vettvangi, gagnvart fjölmiðlum, stjórnvöldum og öðrum samtökum, og sker úr um þau atriði varðandi störf eða málefni félagsins sem ekki eru ákveðin í félagssamþykkt eða með atkvæðagreiðslu á fundum. Stjórnin velur, innan sinna vébanda, þann eða þá, er hafa leyfi til að skuldbinda félagið og ávísa greiðslum úr sjóði þess. Stjórnin skal færa og gefa út félagaskrá, og annast innheimtu félagsgjalda.
    
    
16. Stjórnarfund skal boða með hæfilegum fyrirvara. Hann telst því aðeins löglegur að a.m.k 2 stjórnarmenn sæki hann. Afl atkvæða ræður úrslitum á stjórnarfundum. Falli atkvæði jöfn ræður atkvæði stjórnarformanns.
    
    
17. Stjórn félags er skylt að efna til almenns félagsfundar innan fjórtán daga ef minnst 1/3 félagsmanna óskar þess. Almennir fundir skulu auglýstir á tryggilegan máta með að minnsta kosti 1 dags fyrirvara.
    
    

---

SÍÐAST UPPFÆRT: 12. DESEMBER 2013 - HEIMASÍÐA INTER